Reggíkóngarnir í Hjálmum voru að senda frá sér glænýtt lag sem ber titilinn „Hvað gera fjöllin“. Hér er á ferðinni sérlega dansvænt og grípandi lag sem dregur upp áhugaverða samlíkingu milli manna og náttúrunnar. Á meðan við mannfólkið eigum það til að flækja hlutina upp úr öllu valdi og hlaða á okkur óþarfa áhyggjum, standa fjöllin keik. Þau virðast sýna ótrúlegt æðruleysi, hafa engar áhyggjur og kippa sér ekki upp við þær breytingar sem verða í kringum þau.
Lagið var hljóðritað á þessu ári í Hljóðrita og Skammakróknum. Upptökum stýrðu þeir Guðmundur Kristinn Jónsson og Sigurður Guðmundsson, en Guðmundur Kristinn sá einnig um hljóðblöndun og hljómjöfnun.
Auk kjarna hljómsveitarinnar njóta Hjálmar aðstoðar góðra gesta í laginu, en aukagítarinn er í höndum Rubins Pollock og Davíð Crivello sér um raddanir.
Hjálmar skipa:
-
Þorsteinn Einarsson
-
Sigurður Guðmundsson
-
Guðmundur Kristinn Jónsson
-
Helgi Svavar Helgason
-
Valdimar Kolbeinn Sigurjónsson
Nýja lagið er komið á streymisveitur og það er tilvalið til að dilla sér við það og minna sig á að anda djúpt – og hafa aðeins minni áhyggjur, rétt eins og fjöllin.
